Алматы әкімі Дархан Сатыбалды электр желілерін дамытуға арналған кеңес өткізді. 2026 жылға дейін қаланың энергетикалық жүйесін жаңғырту және дамытуға бағытталған басым жобалар айқындалды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
2026 жылы қала бойынша 379 шақырым электр желісін жаңғырту жоспарланып отыр, оның 269 шақырымы «Алатау Жарық Компаниясы» АҚ-ның желілеріне тиесілі. Аталған кезеңде 14 жаңа жоба іске асырылып, бұрын басталған 8 өтпелі жоба жалғасын табады. Басым бағыттардың қатарында Жетісу ауданында «Кирпичная» қосалқы станциясын салу, Нұр-Алатау шағынауданындағы электр желілерін дамыту, сондай-ақ Бостандық, Наурызбай, Алатау және Медеу аудандарындағы желілерді қайта жаңғырту жұмыстары бар.
Жаңа қосалқы станциялар салынып, трансформаторлық пункттер жаңартылады, әуе желілерінің бір бөлігі кабельдік форматқа көшіріледі. Бұл электр желілеріндегі апаттық жағдай санын азайтып, қаланың энергия жүйесінің сенімділігі мен тұрақтылығын арттыруға мүмкіндік береді. Барлық жоба бойынша мерзім мен сапаға қатаң бақылау жүргізуді тапсырдым. Алматы энергиямен қамтуда іркіліссіз дамуға тиіс, - деді қала әкімі.