Ақтөбеде киберполицейлер интернет-алаяқтың сыбайласын анықтады, – деп хабарлайды kazlenta.kz тілшісі Polisia.kz сайтына сілтеме жасап.
Ақтөбе облысы полиция департаментінің қызметкерлері интернет-алаяқтық фактісі бойынша жүргізілген жедел-іздестіру іс-шаралары барысында Павлодар қаласындағы 22 жастағы күдіктіні анықтап, ұстады. Анықталғандай, Ақтөбе қаласының тұрғынына белгісіз адам қоңырау шалып, өзін ұялы байланыс операторының қызметкері ретінде таныстырған. SIM-картаның жарамдылық мерзімін ұзарту сылтауымен ол құпия кодты иемденген. Кейін жәбірленушіге өзін банк қызметкері ретінде таныстырған тағы бір адам хабарласып, соның нәтижесінде жәбірленуші 1 600 000 теңге көлемінде несие рәсімдеп, көрсетілген есепшотқа ақша аударған.
Тергеу барысында Павлодар қаласының тұрғыны алаяқтардың нұсқауымен ұрланған ақшалай қаражатты есепшоттардан қолма-қол шешіп алып, оның бір бөлігін өзіне қалдырып, қалғанын кураторға аударып отырғаны анықталды. Аталған дерек бойынша сотқа дейінгі тергеп-тексеру жүргізілуде. Сондай-ақ күдіктінің осыған ұқсас қылмыстарға қатысы барын тексеріп жатыр. Күдікті уақытша ұстау изоляторына қамалды. Полиция банк, ұялы байланыс операторлары мен құқық қорғау органдарының қызметкерлері телефон арқылы жеке деректерді, SMS-кодтарды және банк карталарының деректемелерін сұратпайтынын ескертеді. Мұндай қоңыраулар түскен жағдайда сөйлесуді дереу тоқтатып, полицияға хабарласу қажет.