Алматыда Халық Қаһарманы Бауыржан Момышұлының ескерткішіне гүл шоқтарын қою рәсімі өтті. Іс-шара 28 гвардияшы-панфиловшылар саябағы аумағында ұйымдастырылды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Рәсімге қолбасшының туыстары, әскери қызметшілер, зиялы қауым өкілдері, ҰҚК Шекара академиясының курсанттары және қала тұрғындары қатысты. Қатысушылар батырдың рухына бір минут үнсіздікпен тағзым етті. Еске сала кетейік, «Халық Қаһарманы» атағы Бауыржан Момышұлына Қазақстан Республикасы Президентінің 2025 жылғы 25 желтоқсандағы №1137 Жарлығымен берілді.
Іс-шара барысында қатысушылар Бауыржан Момышұлы тұлғасының тарихи маңызын, оның әскери іске және жас ұрпақты тәрбиелеуге қосқан зор үлесін, сондай-ақ құрметті атақтың берілуіне қоғам тарапынан жоғары қолдау болғанын атап өтті. Рәсімнің ресми бөлігінен кейін ҰҚК Шекара академиясының курсанттары салтанатты саппен өтіп, әскери құрмет көрсетті.