Абай облысында ірі көлемдегі ұрлық дерегі ашылып, жеті тұлға сотталды, - деп хабарлайды kazlenta.kz тілшісі Polisia.kz сайтына сілтеме жасап.
Бородулиха ауданы полиция бөлімінің тергеу бөлімінде аудан аумағында орналасқан бір ЖШС-ның мүлкін 46 млн 560 мың теңгеден астам сомада ұрлау фактісі бойынша қылмыстық іс тіркелген болатын. Кәсіби әрі жан-жақты жүргізілген тергеу нәтижесінде аталған ұйымның қызметкерлері мен аудан тұрғындарынан құралған жеті адамның қылмысқа қатысы бар екені анықталды. Олардың кінәсі куәгерлердің көрсеткіштері, сараптамалардың қорытындылары және заттай дәлелдер арқылы толық дәлелденді.
Тергеу-оперативтік топтың жүйелі әрі кәсіби жұмысының арқасында қылмыстық іс заңда белгіленген мерзімде аяқталып, сотқа жолданды. Барлық заттай дәлелдер тәркіленіп, заңды иесіне — ЖШС-ға қайтарылды, осылайша зардап шеккен тараптың мүліктік құқықтары қалпына келтірілді. Бородулиха аудандық сотының үкімімен айыпталушылардың барлығы кінәлі деп танылып, әрқайсысына 5 жыл 6 ай мерзімге бас бостандығынан айыру жазасы тағайындалды. Бұл оқиға тергеу органдарының табанды әрі қағидатқа берік қызметі Абай облысында заңдылық пен құқық тәртібін нығайтуға, сондай-ақ азаматтар мен ұйымдардың мүліктік мүдделерін қорғауға елеулі үлес қосатынын көрсетті.