Көлік полицейлері Астана әуежайында тәртіп бұзған шетелдік жолаушыны анықтады, – деп хабарлайды kazlenta.kz тілшісі Polisia.kz сайтына сілтеме жасап.
Жыл басынан бері көліктегі полиция департаменті әртүрлі құқық бұзушылық жасаған 80 мыңнан астам азаматты жауапкершілікке тартты. Олардың 7 049–ы қоғамдық орындарды ластау дерегі бойынша тіркелді. Астана қаласының халықаралық әуежайында көліктегі полиция басқармасының қызметкерлері екінші қабатты патрульдеу барысында ішкі әуе рейстеріне арналған күту залында полиция қызметкерлері Қытай Халық Республикасының 47 жастағы азаматын анықтады. Ол қоғамдық мінез-құлық нормаларын бұзып, белгіленбеген жерде тазалық сақтамай, айналасындағыларға құрметсіздік танытып, қоғамдық орынды ластаған.
Көлік полицейлері құқық бұзушыны қоғамдық орындарды ластағаны үшін әкімшілік жауапкершілікке тартты. Көліктегі ПД қоғамдық тәртіп пен тазалықты сақтау – әрбір азаматтың міндеті екенін еске салады. Мұндай құқық бұзушылықтар айналадағы адамдарға қолайсыздық туғызып қана қоймай, адамдар көп жиналатын орындардағы белгіленген тәртіпті бұзады.