Астанада Триатлон саябағындағы көпірдің астында жаңа заманауи қоғамдық кеңістік ашылды. Мұнда әмбебап спорт алаңы, воркаут аймағы, жаттығу құрылғылары және йогамен айналысуға арналған арнайы орын жабдықталды. Жаңарған аумақ белсенді өмір салтын ұстанатындар үшін тартымды орынға айналады, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Жаңа кеңістіктің техникалық ашылуы өтті. Іс-шара тұрғындардың зор қызығушылығын тудырды: қала тұрғындары мен қонақтары бұрын бос тұрған орынды спорт пен демалысқа арналған заманауи аймаққа қалай айналғанын көруге келді. Ашылу кезінде нысан таныстырылып, қаладағы үздік нұсқаушылардың шеберлік сабақтары өтті.Алматы ауданы әкімдігінің абаттандыру бөлімі басшысы Данияр Қожахметовтің айтуынша, көпір астында бірнеше функционалды аймақ жасалды. Баскетбол мен волейболға арналған әмбебап алаң, воркаут аймағы, сондай-ақ жоғары жүктемелі жаттығу құрылғылары орнатылған. Йогаға қызығатындар үшін бөлек жұмсақ жабындысы бар алаңқай қарастырылған, бұл жаттығуды ыңғайлы әрі қауіпсіз етеді.
«Бұрын бұл жерде ештеңе жоқ, бос аумақ еді. Қазір біз оны бұқаралық спортқа арналған толыққанды кеңістікке айналдырдық. Құрал-жабдықтар арнайы тапсырыспен жеткізілді, вандализмге төзімді. Оларды алып кету мүмкін емес, себебі салмағы 100 келіден асады. Мұндай шешім бұған дейін Астанада болған емес, бұл – бірегей жоба. Іске асыруға бір жарым ай уақыт кетті, біз арнайы жеткізілімді күттік. Болашақта мұнда спорттық қана емес, мәдени іс-шаралар да өткізіледі», – деді Данияр Қожахметов.
Жаңа кеңістік тұрғындарды қатты қуантты. Қонақтар мұндай жобалар қаланы жайлы етіп, бұқаралық спорттың дамуына жағдай жасайтынын және белсенді демалыс мәдениетін қалыптастыратынын атап өтті. Келушілердің айтуынша, алаңқай Триатлон саябағының атмосферасын арттырып, белсенді демалысты ұнататындардың сүйікті орнына айналады.
Бұл нысан тек спорттық аймақ емес, сонымен қатар мәдени шаралар, шеберлік сабақтары мен кездесулер өтетін орын ретінде де қарастырылған. Ұйымдастырушылардың айтуынша, жобаның басты мақсаты – әртүрлі жастағы әрі қызығушылығы бөлек адамдарды біріктіріп, барлығына пайдалы уақыт өткізуге мүмкіндік жасау.
Жаңа алаңның техникалық ашылуы мерекелік көңіл күйде өтті. Көпір астындағы кеңістік тұрғындарға қазірдің өзінде қолжетімді, ал алдағы уақытта мұнда түрлі шаралар өткізіліп, қаланың маңызды орындарының біріне айналады.