Алматы әкімі Дархан Сатыбалды басқарма басшыларымен кеңес өткізді. Жыл басынан бері құрылыс нысандары 886 рет тексеріліп, 486 заңбұзушылық анықталды. 390 нұсқама беріліп, 301 лицензияның күші жойылды, 58 мердігер ұйым, 7 техникалық қадағалау компаниясы және 43 жобалау фирмасы жауапқа тартылды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Заңсыз салынған ғимараттарға қатысты 68 іс сотқа жолданды, оның 35-і сүруге жіберілген. Қазірдің өзінде 33 нысан бұзылды. Қалада инженерлік желілер бойынша 227 нысанда жұмыс жүріп жатыр, алайда 21-інде белгіленген мерзімде үлгермей қалу қаупі бар. Әкім ұзақ уақыт қазылып жатқан жерлер мен жолдың сапасыз қалпына келтірілуін сынға алды. Асфальт төсеу мен жиектас орнату кезінде де заңбұзушылықтар анықталған.Қысқа дайындық аясында 993 техника әзірленді, 56 мың тонна қоспа дайындалып, алғашқы қар ерітетін пункт ашылды. Жыл соңына дейін қажетті қорды 100%-ға жеткізіп, қосымша 66 техника сатып алу жоспарланып отыр, - делінген хабарда.