Алматыдағы «Терренкур» 20 жылдан соң алғаш рет жаңартылды Алматыда «Терренкур» саябағы аймағының ауқымды қайта жаңғырту жұмыстары аяқталды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Бұл жайлы да көрікті орын қаланың шығыс бөлігінде, Тәттімбет көшесі мен Достық даңғылына қатарласа орналасқан.4 гектардан астам аумақта жаңа жаяу жүргіншілер бағыттары, кеңейтілген «денсаулық соқпағы» және Есентай өзенінің әсем көрінісін тамашалауға мүмкіндік беретін ағаш көпірі бар заманауи саябақ құрылды. Су айдыны нығайтылып, тазартылып, абаттандырылды. Жағасында сахна, ал қарсы бетінде ашық аспан астындағы амфитеатр пайда болды. Белсенді тұрғындар үшін үш теннис үстелі мен төрт шахмат үстелі, воркаут аймақтары, ал балалар үшін ойын экожайымен жабдықталған екі заманауи алаңша жасалды. Саябақтың айшықты нышаны — алтын күмбезді ақ ротонда және аспалы гүлдермен көмкерілген жолдар.Бүкіл саябаққа 30 жаңа орындық, автоматты суару жүйесі және заманауи жарықтандыру орнатылды. Айта кету керек, «Терренкурға» күн сайын 3,5 мыңнан астам қала тұрғыны мен турист келеді.
