"Ел үшін егілемін" коронавирустық пандемиямен күрес жөніндегі азаматтық штабының қатысуымен Батыс Қазақстан облысында COVID-19 жағдайы және вакцинациялау қажеттілігі туралы объективті ақпарат беру мақсатында «БҚО-дағы вакцинациялау: вакцина алмағандардың инфекция жұқтыру қаупі» тақырыбында онлайн конференция өткізілді. Шара барысында штаб мүшелеріне халықты мазалайтын өзекті сұрақтар қойылып, толық жауап алынды, деп хабарлайды kazlenta.kz.
Аталмыш тәуелсіз белсенділер бірлестігі 2021 жылғы 3 тамызда коронавирус пандемиясымен күрес мақсатында құрылған. Азаматтық штабтың міндеті-COVID-19 вакцинациясы туралы объективті ақпараттың максималды мөлшерін ұсыну және азаматтарды вакцинациялауға сендіру. Ұйымдастырушылар ұжымдық иммунитетті қалыптастыра отыра, халықтың 70-80%-ын вакцинациялау нәтижесінде ғана мүмкін болатын өмірге қайта оралуды мақсат етеді. Штаб құрамында 200-ге тарта белгілі медицина мамандары, кәсіпкерлер, азаматтық белсенділер, қоғам қайраткерлері мен сарапшылар бар.
Шара басында штаб мүшесі, «Талап» қолданбалы зерттеулер орталығының басшысы Рахым Ошақбаев жалпы өңірдегі эпидемиологиялық ахуал жайында баяндап өтті. Келесі кезекте көрермендерден, БАҚ өкілдерінен келген сұрақтарға эпидемиолог Айнагүл Мұханова жауап берді. Конференция барысында штаб мүшелері әлеуметтік желілерде де ақпараттық-түсіндіру жұмыстарының жүргізілуінің маңызын атап өтті. Осы орайда штаб мүшесі, блогер, журналист Динара Сәтжан да арнайы эпидемиолог және басқа да мамандармен тікелей эфирлерге кіріп, халықпен жұмыстануда.
Брифингте көпшілікті мазалайтын жұмыстан босату тақырыбы да қозғалды. Юрист, Қазақстан заңгерлер одағының Нұр-Сұлтан қаласындағы филиалының төрағасы, штаб мүшесі Серік Беркамалов тақырып төңірегіндегі сұрақтарға жауап берді. Қаулы бойынша жұмыс беруші вакцина алмаған жұмысшыны жұмыстан шығара алмайды. Медициналық қарсы көрсеткіштері жоқ бола тұра вакцина алудан бас тартқан жұмысшыға жұмыс беруші 3 нұсқа ұсынады. Қашықтан жұмыс істеу, уақытша демалыс алу немесе апта сайын өз есебінен ПЦР-тест тапсыру. Демек жұмыс беруші қызметкерді қаулы негізінде жұмыстан шығара алмайды.
Санитариялық-эпидемиологиялық бақылау комитетінің ресми өкілі Ержан Халиұлы өз кезегінде Ashyq бағдарламасы бойынша демалыс күндері жұмыс істеуге болатын жерлер мен бағдарламада кімдерге жасыл түс жанатынын және олардың жүріп-тұруына деген шектеулер жайында сөз қозғады.
Брифинг соңында репродуктолог Вячеслав Локшин вакцина алғаннан кейінгі бала көтеру мәселесі жайында айтып өтті.