Алматы әкімі Бостандық ауданындағы нысандардың құрылысы мен қайта жаңғырту жұмыстарын тексерді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
1967 жылы салынған №10 мектеп-интернатының сейсмикалық тұрғыдан нығайту және күрделі жөндеу жұмыстарының барысы тексерілді. Бұл ғимаратта 180 бала тұрып оқиды. Интернатты жаңартумен қатар, спорт алаңдары орнатылған аумақты көріктендіру қолға алынған. Левитан көшесінде ауысымына 500 адам қабылдайтын емхананың құрылысы жалғасып жатыр. Жаңа медициналық орталықта эндоскопия, амбулаторлық хирургия және зертхана бөлімдері болады. Сондай-ақ, «Қазақстан» РТРК медиаорталығының құрылысы да тексерілді. Сапа стандартын сақтай отырып, жобаны белгіленген мерзімде – жыл соңына дейін аяқтау тапсырылды.