Алматыдағы Республика Сарайында мәдениет және өнер қызметкерлері күніне арналған марапаттау рәсімі өтті. Мәдениетті дамытуға қосқан үлесі үшін 50-ден астам адамға мемлекеттік наградалар табысталды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
«Парасат» ордені Ерболат Әуезовке берілсе, «Құрмет» орденіне кітапханашы Қуаныш Исабекова, «IL CANTO» тобының солистері және «Сазген сазы» ансамблінің артисі лайық деп танылды. «Ерен еңбегі үшін» медалімен «Алатау» театрының актрисасы Алма Аманжолова, акробат Нұрлан Алшынбаев және режиссер Толқын Садықова марапатталды.Құрметті атақтар мен марапаттар актерлерге, суретшілерге, музыканттарға, кітапхана, хайуанаттар бағы мен театр қызметкерлеріне табысталды. Сонымен қатар, Алматы қаласының әкімі Ерболат Досаевтың атынан 25 адам мәдени мұраны сақтауға қосқан үлесі үшін Алғыс хатпен марапатталды.
