Алматы әкімі Ерболат Досаевтың тапсырмасымен 2025 жылы Алмалы ауданында «Халық қатысатын бюджет» (ХҚБ) бағдарламасы аясында 56 аула көріктендіріледі, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Қазіргі таңда Панфилов көшесі, 30; Шагабутдинов көшесі, 30; Төле би көшесі, 160; Қабанбай батыр көшесі, 91; Шәріпов көшесі, 68 мекенжайындағы бес аулада жұмыс толық аяқталды.Мұнда ойын және спорт алаңдары жаңартылып, резеңке жабын төселді, орындықтар мен қоқыс жәшіктері орнатылды. Шәріпов көшесі, 68 үй тұрғындарының өтініші бойынша спорт алаңшасының үстіне қалқа орнатылды.Сәуір мен қазан аралығында ауданда 45 жоба жүзеге асырылады. Бұған қоса, 7 көпқабатты тұрғын үйге жөндеу жүргізіліп, оның бесеуінде жеделсаты жаңартылады.2024 жылы Алмалы ауданында 18 жеделсаты жаңартылып, 7 үй жөндеуден өтті, 52 жоба жүзеге асып, 23 аула көркейтілді.