Елордада «Astana» Әлеуметтік-кәсіпкерлік корпорациясы» АҚ-да «1000 орын-көше саудасы» жобасын іске асыру аясында сауда павильондарын орналастыру үшін 650-ден астам жер учаскесі бөлінді. Ал осы жылдың басынан бүгінгі күнге дейін аталған жоба аясында 20 жер учаскесі бөлінді, деп хабарлайды қала әкімдігінің ресми сайты.
Бөлінген жер учаскелері жеміс-жидек, көкөністер, тамақ өнімдерін, дайын өнімдер (сусындар, балмұздақ, фаст-фуд) сататын объектілерді орналастыруға арналған.
Халықтың әлеуметтік осал топтарына жататын кәсіпкерлерге «Astana» ӘКК» АҚ жер учаскелерін беру бойынша қолданыстағы қағидаларға сәйкес арнайы комиссияның шешімі негізінде жылына 30-дан аспайтын жер учаскелерін беру көзделген.
Бүгінгі таңда жобаны іске асыру аясында 1700-ден астам жұмыс орны құрылып, жеке инвестиция ретінде 1,1 млрд теңгеден астам қаражат тартылды. Бөлінген учаскелердің жалпы ауданы 8 313 шаршы метрді құрайды.
Тұрғын үй алаптары мен жаңа құрылыс жүріп жатқан аудандардан учаскелер бөлу жоспарланып отыр. Сонымен қатар, бүгінгі таңда қалада көптеген қоғамдық кеңістіктер, алаңдар мен саябақтар ашылуда. Сондай-ақ жоғарыда көрсетілген орындарды сауда павильондарын орналастыру арқылы дамытуға мүдделі.
Бүгінгі күні «Astana» Әлеуметтік-кәсіпкерлік корпорациясы» АҚ жер учаскелерін беру жөніндегі аукционның кезекті кезеңін дайындауға кірісіп кетті.
Аукционды 2021 жылдың қыркүйегінде өткізу жоспарланып отыр.