Қостанайда полиция қызметкерлері алаяқтық әрекетке қатысы бар екі кәмелетке толмаған жасөспірімді анықтады, – деп хабарлайды kazlenta.kz тілшісі Polisia.kz сайтына сілтеме жасап.
Оқиға телефон қоңырауынан басталған. Бейтаныс адамдар жергілікті тұрғынға оның келіні жаяу жүргіншіні қағып кетті деп хабарлап, мәселені шешу үшін 7 миллион теңге талап еткен. Алайда жәбірленушінің қолында тек 2 мың доллар болған. Қатты үрейленген әйел ақшаны белгіленген адамға табыстаған. Кейін туысымен сөйлескеннен кейін ғана оның ешқандай жол апатына қатысы жоқ екенін білген. Жедел-іздестіру шаралары барысында полицейлер 17 жастағы екі жасөспірімді ұстады. Олар ақшаны басқа валютаға айырбастап, өзге шоттарға аударып үлгерген. Сондай-ақ сол күні дәл осындай схема бойынша тағы 1 миллион теңге жымқырылғаны анықталды, бірақ бұл жағдайда жәбірленуші әлі табылған жоқ. Полиция күмәнді жағдайға тап болған азаматтарды 102 нөміріне хабарласуға шақырады.
Тергеу барысында алаяқтардың Telegram арқылы “жұмыс” ұсынғаны белгілі болды. Қазір сотқа дейінгі тергеу жүргізілуде, күдіктілердің басқа да осындай қылмыстарға қатысы бар-жоғы тексерілуде. Полиция соңғы уақытта мұндай алаяқтық жағдайлары жиілеп кеткенін ескертіп, азаматтарды сақ болуға шақырады. Егер сізге күмәнді қоңыраулар түссе, бірден сөйлесуді тоқтатып, жақындарыңызға қайта қоңырау шалыңыз. Сондай-ақ SMS арқылы жіберілген кодтар мен құпия ақпараттарды ешкімге бермеу қажет.