Шығыс Қазақстанда ауыл округі әкімі мемлекеттік қызметтің беделін түсіргені үшін жазаланды, - деп хабарлайды kazlenta.kz тілшісі Tengrinews.kz сайтына сілтеме жасап.
Самар ауылдық округі әкімі мемлекеттік сатып алу туралы заңнаманы бұзып, басқа әлеуетті жеткізушілерді тендерге тең қатысу мүмкіндігінен айырып, бір ғана ЖШС-мен негізсіз екі шарт жасаған.
Келісімшарттардың жалпы сомасы 20 млн теңгеден асқан. Бұл қаражатқа қатты тұрмыстық қалдықтарға арналған полигонға қоршау және аудан орталығына бейнебақылау жүйесін орнату жұмыстары сатып алынған. Алайда соңғы шарт бойынша нақты орындалмаған жұмыстар үшін ішінара төлем жасалған.
"Мемлекеттік сатып алуды ұйымдастыру және өткізу тәртібін бұзғаны үшін ШҚО аудан прокуратурасының қаулысына сәйкес Самар ауылдық округі әкімі ӘҚБтК-нің 207-бабының 11-бөлігі бойынша әкімшілік жауапкершілікке тартылып, оған 200 АЕК мөлшерінде айыппұл салынды. Сонымен қатар, аудан прокуратурасы мемлекеттік қызмет істері жөніндегі уәкілетті органның әдеп кеңесінің қарауына ауыл әкіміне тәртіптік жауапкершілік қолдану туралы ұсыныс енгізді", - деп жазылған хабарламада.
Мемлекеттік қызмет істері жөніндегі уәкілетті органның әдеп кеңесінің шешімі негізінде мемлекеттік қызметтің беделіне нұқсан келтіретін тәртіптік теріс қылық жасағаны үшін ауыл әкіміне қызметіне толық сәйкес еместігі туралы ескертілді.