Алматы әкімі Ерболат Досаев Қытайға жұмыс сапары аясында Шэньчжэнь мэрі Цинь Вэйчжунмен кездесті, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Келіссөздердің негізгі тақырыптары – инвестиция, цифрландыру және қаланы жоспарлау. Қытайдың технологиялық орталығы саналатын Шэньчжэнь 45 жыл ішінде «ақылды қала» тұжырымдамасын жүзеге асыруда айтарлықтай жетістіктерге жетті. Алматы әкіміне стратегиялық және кешенді қала жоспарлау қызметтерін ұсынатын Shenzhen Urban Transportation Planning Center Co., Ltd. (SUTPC) орталығы таныстырылды. SUTPC орталығы қалалардың цифрлық көшірмесін жасап, озық технология арқылы көлік инфрақұрылымын басқарады. Бұл көлік легін оңтайландыруға, жолдағы кептелісті азайтуға және қауіпсіздікті арттыруға көмектеседі.Кездесу қорытындысы бойынша тараптар цифрландыру, қала жоспарлау және технология мен тәжірибе алмасу саласындағы серіктестікті кеңейту туралы келісті.