Өткен жылы көлік полицейлері мемлекетаралық іздеуде жүрген 127 қылмыскерді ұстады, – деп хабарлайды kazlenta.kz тілшісі Polisia.kz сайтына сілтеме жасап.
2024 жылы жедел-іздестіру іс-шараларын жүргізу барысында көліктегі полиция департаментінің қызметкерлері мемлекетаралық іздеуде жүрген 127 қылмыскерді анықтап, ұстады. Оның ішінде 50 қылмыскер - Ресей, Өзбекстан, Армения, Қытай, Үндістан, Түркия, Польша және Әзірбайжан азаматтары. Ұсталғандардың барлығы уақытша ұстау изоляторларына қамалды, ал 77-сі іздестіру бастамашыларына берілді. Осы жылдың басынан бері 23 қылмыскер ұсталды, оның 7-уі уақытша ұстау изоляторына қамалды, ал 16 адам іздестіру бастамашыларына берілді. Ұсталғандардың қатарында негізінен ауыр және аса ауыр қылмыстар жасағандар бар.
Мәселен, 5 ақпанда Маңғыстау теміржол станциясында Көліктегі ПД жедел бөліністерінің қызметкерлері ауыр қылмыс жасаған Қазақстан Республикасының азаматын ұстады. Ұсталған азамат изоляторға қамалды. Ол Қазақстанға Түркиядан келген болатын. 8 ақпанда Алматы халықаралық әуежайында желілік полиция бөлімінің қызметкерлері Ресей Федерациясының азаматын ұстады. Қылмыскер Ресей Федерациясының қылмыстық кодексінің 132-бабында көзделген қылмыс, яғни, жыныстық сипаттағы зорлық-зомбылық жасағаны үшін 2023 жылдан бері іздеуде болған. Ол Қазақстанға Грузиядан келіп, артынша изоляторға қамалды. Сонымен қатар аумақтық полиция департаменттерімен өзара іс-қимыл жасасу шеңберінде Қазақстанның әртүрлі өңірлерінде іздеуде жүрген 5 қылмыскер ұсталды. Сондай-ақ хабар-ошарсыз жоғалған үш азаматтың орналасқан жері анықталды. Мемлекетаралық іздеуде жүрген қылмыскерлерді анықтау және ұстау мәселелері Көліктегі ПД басшылығының ерекше бақылауында.