Солтүстік Қазақстан облысы Булаев станциясындағы желілік полиция бөлімшесінің қызметкерлері Есілкөл — Петропавл бағытындағы электр пойызынан мас жолаушыны ұстап, түсіріп алды, — деп хабарлайды kazlenta.kz тілшісі Polisia.kz сайтына сілтеме жасап.
Көлік полицейлері тексеру барысында 53 жастағы облыс тұрғынын анықтады. Масаң күйдегі ер адам балағат сөздер айтып, жолаушылардың тыныштығын бұзған, сондай-ақ құқық қорғау органы қызметкерінің заңды талаптарына қарсылық көрсеткен.
Құқық бұзушыға қатысты алкогольді ішімдіктер ішкені, қоғамдық орындарға масаң күйінде келгені, ұсақ бұзақылық жасағаны және құқық қорғау органы қызметкерінің заңды өкіміне немесе талабына бағынбағаны үшін 5 АЕК (19 660 теңге) мөлшерінде айыппұл салумен әкімшілік хаттама толтырылды.
Ұсақ бұзақылық және полиция талабына бағынбау бойынша іс сотқа жолданды.
Айта кетейік, бұл баптар бойынша құқық бұзушы 15 тәулікке дейін әкімшілік қамауға алынуы мүмкін.
Жыл басынан бері көліктегі ПД қызметкерлері түрлі әкімшілік құқық бұзушылықтар жасағаны үшін 10088 құқық бұзушыны әкімшілік жауапкершілікке тартты. Оның ішінде, белгіленбеген жерден теміржолды кесіп өткені үшін 5563 азамат, алкогольге қарсы заңнаманы бұзғаны үшін 725 жолаушы, қоғамдық орындарда адамдардың мазасын алып, тиіскені үшін 655 тұлға, ұсақ бұзақылық жасағаны үшін 66 адам, сондай-ақ темекі шегуге тыйым салуды бұзғаны үшін 316 тұлға жазаланған.