Ақтөбе облысында полиция танысына заңсыз несие рәсімдеген күдіктіні ұстады, – деп хабарлайды kazlenta.kz тілшісі Polisia.kz сайтына сілтеме жасап.
Ақтөбе облысында полиция алаяқтық фактісі бойынша қылмыстық істі тергеп жатыр. Жәбірленуші полицияға өзіне заңсыз несие рәсімделгені туралы арызданды.
Тергеу іс-шаралары барысында күдікті әйел Қандыағаш қаласында танысының үйінде қонақта болып, “жұмыс істеймін” деген сылтаумен үй иесінің телефонын сұрап алғаны анықталды. Телефонды алғаннан кейін әйел бірнеше минут ішінде екі банктен 1 млн 350 мың теңгеге несие рәсімдеп, оларды өз анасының шотына аударған.
Алаяқтық фактісі бойынша сотқа дейінгі тергеп-тексеру жүргізілуде.
Полиция департаменті мұндай заңсыз операцияларды болдырмау үшін мобильді құрылғыларды бейтаныс адамдарға сеніп беруге болмайтынын еске салады.