«Киров» клубының жас альпинистері Алматыдағы №2 балалар клиникалық ауруханасының науқастары үшін жаңа жылдық ерекше құттықтау рәсімін өткізді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Алматы гарнизонының баспасөз қызметі хабарлағандай, олар Аяз ата болып жаңа жылдық сыйлықтар тапсыру үшін шатырдан тікелей палаталардың терезесіне кірген. Балалар өз кезегінде өлең оқып, әндер айтып алғыс білдірді. 2017 жылы бастау алған бұл дәстүр жыл сайын әскери жетекші Бақытжан Перімбетовтің басшылығымен және Алматы қаласының Қорғаныс істері департаментінің қолдауымен өткізіледі.
Биыл №110 мектеп-гимназиясының 9-сынып оқушысы, альпинизммен айналысатын Пархат Зиинкал Аяз Ата болды.8 жылдан астам тарихы бар «Киров» клубының тәрбиеленушілері бұған дейін де көпқабатты үйлердің шатырынан түсіп, тұрғындарды Жаңа жылмен құттықтаған болатын. Осы бастаманың арқасында ауруханада жаңа жылды қарсы алып жатқан балалар шынайы жаңа жылдық ғажайыпты сезінді.