Полицейлер шетелдік саяхатшыға жәрдемдесті, – деп хабарлайды kazlenta.kz тілшісі Polisia.kz сайтына сілтеме жасап.
Жақында Көксу ауданында полиция қызметкерлері Алматы – Өскемен республикалық маңызы бар автожолында көлігі істен шыққан Түркия азаматына көмек көрсетті.
Бұл оқиға қыс мезгілінде, шетелдік саяхатшының Қазақстанға сапары кезінде орын алған. Елді мекендерден шалғай, ауа райы қолайсыз жағдайда турист ауыр жағдайға тап болды.
Патрульдік қызмет барысында тәртіп сақшылары жол жиегінде тоқтап тұрған көлікті байқап, оның тоқтау себебін анықтау үшін жақындады. Техникалық ақауды бағалай келе, полицейлер жүргізушіге көлікті жөндеуге көмектесіп, оның қауіпсіздігін қамтамасыз етіп, сапарын жалғастыруға мүмкіндік берді.
Шетелдік саяхатшы полиция қызметкерлерінің жеделдігі мен жанашырлығы үшін шынайы ризашылығын білдірді. Ол қазақстандық полицейлердің осындай жылы қарым-қатынасы мен көмекке дайындығы ел туралы жағымды әсер қалдырғанын ерекше атап өтті.
Бұл жағдай құқық қорғау органдарының тек жол қауіпсіздігін қамтамасыз етіп қана қоймай, кез келген көмекке мұқтаж азаматқа жәрдемдесуге әрдайым дайын екендігінің айқын көрінісі болды.