Батыс Қазақстан облысында тергеу изоляторына есірткі алып өтпек болған әрекет анықталды, – деп хабарлайды kazlenta.kz тілшісі Polisia.kz сайтына сілтеме жасап.
Батыс Қазақстан облысы бойынша ҚАЖД-ға қарасты №74 мекемесінің мәліметіне сәйкес, жақында тергеу изоляторына есірткі заттарын заңсыз жеткізу әрекеті әшкереленді. Құқық бұзушы азамат 191-баптың 1-тармағы, 2-бөлігі бойынша айып тағылған сотталғанның туысы болып шықты. Ол сотталғанға дәрі-дәрмек жеткізу сылтауымен арнайы келген.
Режимдік бөлім қызметкерлері дәрілік заттарды тексеру барысында 40 грамдық «Левомеколь» жақпамайының түтігінен ерекше иісі бар, ақ ұнтаққа ұқсас зат салынған полиэтилен пакетті анықтады. Аталған зат дереу тәркіленіп, барлық процесс бейнетаспаға жазылды.
Режим қызметкерлерінің айтуынша, мұндай заңсыз әрекеттер жиі кездеседі. Қылмыскерден жауап алу кезінде ол өзінің бұл әрекетінің қылмыстық жауапкершілікке әкелетінін түсінбегенін айтты.
Орын алған дерекке байланысты Орал қаласының полиция басқармасы ҚР Қылмыстық кодексінің 297-бабы, 1-бөлігі бойынша сотқа дейінгі тергеуді бастады.
Заң бойынша есірткі заттарын заңсыз жеткізу – ауыр қылмыс. Мұндай әрекеттер қатаң жазаланып, қылмыскерлердің жазадан құтылмайтынына кепілдік бар.