Ағымдағы жылдың 31 наурызының таңғы сағат 06:30 шамасында Алматы-Өскемен тас жолының 783 шақырымында Белорусь елінің 24 жасар азаматы Алматы-Өскемен тас жолының бойымен Солтүстік бағытта қозғалып келе жатып, ауа райының қолайсыз болуына байланысты, көлік құралымен жол жиегіне түсіп кеткен, деп хабарлайды kazlenta.kz.
Фураның басы жол жиегінде, ал тіркеуіші жол үстінде қалып, трасса бойын толық жауып қалған. Жақын жерде шағын көлік кептелісі пайда болған. Жүргізуші Аягөз аудандық полиция бөлімінен көмек сұраған.
Оқиға орнына жедел жеткен Аягөз АПБ жол және техникалық инспекция тобының мемлекеттік автоинспекторлары полиция капитаны Садыков Руслан Касенович, полиция лейтенанттары Баяхметбай Заңғар, Билялов Қайрат Ноғайбайұлы болған мән жайды дереу анықтап, мәселені шешудің оңтайлы шешімін тапқан. Инспекторлар погрузчик көлігін алдыртып, фураны жол үстіне шығару жұмыстарын жүргізді. 1 сағаттан артыққа созылған жұмыстар нәтижесінде фура жол үстіне шығарылды.
Көлікке материалдық шығындар келмеген. Адамдар бәрі аман-сау. Фура жүргізушісі полиция қызметкерлеріне алғысын білдіріп, алыс сапарын жалғастырды.