Елордада техника дүкенінен екі рет ұрлық жасаған тұрғын ұсталды, – деп хабарлайды kazlenta.kz тілшісі Polisia.kz сайтына сілтеме жасап.
Астана қаласы Алматы ауданы ПБ криминалдық полиция қызметкерлері жедел-іздестіру іс-шараларын жүргізу кезінде ұрлықтың екі фактісіне қатысы бар деген күдікпен 35 жастағы тұрғынды анықтады.
Тергеу барысында әйелдің оң жақ жағалауда орналасқан электронды техника дүкеніне келгені белгілі болды. Сатып алушы кейпінде тауарларды қарап жүріп, күдікті куәгерлердің жоқтығына көз жеткізген соң гаджеттер тұрған сөреден құны 68 мың теңгеден асатын Samsung телефонын алып кеткен. Араға бірнеше күн салып әйел қылмыс орнына қайта келіп, бұл жолы да тура сол марканың телефонын алып сауда залынан шығып кеткен.
Аталған фактілер бойынша сотқа дейінгі тергеп-тексеру жүргізілуде, әйелдің елорда аумағында осыған ұқсас бұрын жасалған қылмыстарға қатысы бар-жоғы анықталып жатыр.