Алматы әуежайының бұрынғы президенті 8 жылға бас бостандығынан айырылды, деп хабарлайды kazlenta.kz тілшісі Zakon.kz сайтына сілтеме жасап.
Айбол Бекмұхамбетов Алматы әуе айлағының президенті қызметінен 2018 жылдың шілдесінде кеткен.
2018 жылғы 20 желтоқсанда әуежайдың желілік полиция бөліміне әуежайдың жаңа президенті Болат Ержановтан авиакеросиннің ұрланғаны туралы хабарлама түскен.
Іс бойынша тергеу бес жылға жуық уақытқа созылды.
Сотталушылар соңғы сөзінде өздерінің кінәсіз екенін айтып, соттан әділ шешім шығаруды сұрады.
Сот Алматы әуежайының экс-президенті Айбол Бекмұхамбетов пен авиациялық жанар-жағармай қызметінің басшысы Қуаныш Тұмышевты 8 жылға бас бостандығынан айырды. Олар жазасын орташа режимдегі колонияда өтейді.
Үкім заңды күшіне енген жоқ.