Қылмыстық істер жөніндегі облыстық мамандандырылған ауданаралық сот Бауыржан Майрыхов пен оның жақтастарына қатысты үкім шығарды. Олар 2022 жылдың 4 қаңтарына қараған түні журналист Амангелді Батырбековке қастандық ұйымдастырған деген күдікке ілінген. Алайда оқ журналистке емес, оның 31 жастағы ұлына тиеді. Оқ жарақатын алған жігіт ота жасатып, жансақтау бөлімінде жатады. Аталған іс бойынша бес адам күдікке ілініп, барлығы қатаң жаза алды.
"Майрыхов Бауыржан Құрбаналиевич қауіпсіздігі барынша жоғары колонияда 11 жыл 3 ай жазасын өтесін. Сабырходжа Моллаходжаев 11 жылға, Абдухамит Қуандықов 13 жылға, Мейіржан Досболов 12 жылға, Нұрғали Қыдырәлиев 12 жыл 6 айға бас бостандығынан айырылсын. Барлығы да жазасын қауіпсіздігі жоғары мекемеде өтейді", - деді облыстық ауданаралық сот төрағасы Қасым Қалмағанбетов.