Шымкент қаласының тұрақты дамуы мен қала тұрғындарының қауіпсіз тіршілігін қамтамасыз ету мақсатында «Экологиялық дағдарыс және оны шешу жолдары» тақырыбында конференция өтті. Жиын аясында экосарапшылар тұрмыстық қалдықтарды өңдеумен қатар ауаның ластануын азайту бағытындағы түрлі жобаларды ұсынды.
Қоқыс, ауаның ластануы, жаһандық жылыну. Экологтар мен экосарапшылар дабыл қаққан негізгі тақырыптардың бірі осы болды. Конференцияда экобелсенділер жыл өткен сайын жер бетін басқан қоқыс мәселесіне ерекше назар аударып, алдын-алу бағытында ерікті жастардың зерттеу жобаларымен танысты.
Шымкент қаласында экожүйеге қызыққан жастардың саны күн санап артып келеді,- дейді мамандар. Қазіргі таңда дәл осы бағытта қала аумағында 200-ге жуық ерікті тіркеліп белсенді болып жүр екен. 2019 жылдан бері қоршаған ортаға жанашырлық танытып экобелсенді атанып жүрген, Голярко Владислав қазіргі таңда экокәсіппен айналысады. Яғни шикізаттарды жинап, қайта өңдейтін арнайы зауытқа өткізеді.Сондай-ақ арнайы экодүкен де ашқан. Алдағы уақытта табиғат жанашыры мұндай дүкен зауыттарды қала аумағында көбейтуді жоспарлап отыр. Ауқымды шарада экологиялық мәселелерден бөлек экологиялық кітаптар да келушілер назарына ұсынылды. Тақырыпқа қызыққан жастар спикерлерге өз сұрақтарын жолдап түрлі эко ұйымдардың жұмысымен жақынырақ танысты. Шымкент сияқты мегаполис үшін аталмыш тақырып өзекті. Сондықтан, қала жастарының бұл бағыттағы жұмыстары жандана түспек.