Еліміз бойынша жаппай өтіп жатқан «Зорлық-зомбылыққа қарсы белсенділіктің 16 күні» акциясына мегаполис жастары да үн қосты. Шымкент қалалық жастар ресурстық орталығының мамандары жергілікі оқу орындарының студенттерімен бірлесіп, «Қыз тағдыры - ел тағдыры» атауымен үлкен іс- шара ұйымдастырды. Кездесуге университет жастары мен білікті психологтар қатысып отбасылық құндылықтардың айқын бағыттарына тоқталды.
Ресми статистикалық мәліметтер бойынша тұрмыстық зорлық-зомбылық әрбір үшінші отбасында кездесіп, тіркелген қылмыстардың 30 пайызын құрайды. Оның басты себептерінің бірі - қызғаныш, маскүнемдік, бұзақылық, әлеуметтік жағдайдың төмендігі дейді мамандар.16 күндік акция аясында жастар ресурстық орталығының ұйымдастыруымен 600-ге жуық жасөспірім мен студенттер түрлі бастамаларға қатысты. Олар зорлық-зомбылықтың алдын-алу,тұрмыстық зорлық-зомбылыққа ұшыраған жағдайда аман қалу іс - әрекеттері жайын кеңінен талқылады.
"Қазақстанда тұрмыстық зорлық зомбылық тақырыбы белең алып тұрған кезеңде дер кезінде азаматтық үн қату біздің міндетіміз. Өз құқықтары мен қорғану әдісін білмейтін жастар жетерлік. Бұл оқу орындарындағы әлімжеттік мәселесіне де қатысты. Түсіндірме шараларын жүргізіп, білікті мамандардың бірлесуі қажет дүние.Шымкент қаласы еліміздегі ең үлкен қалалардың бірі болғандықтан, бізде де шешімін күткен мәселелер жетерлік. Жастар ресурстық орталығы алдағы уақытта көптеген бастамаларға мұрындық болады деген үміттеміз", - дейді Шымкент қалалық әйелдер кеңесі төрайымы Баян Айтбекқызы.