30 қазан – 2 қараша аралығында Ұлытау облысында 9-сынып оқушыларына арналған химия пәнінен Қ.Сәтбаев атындағы республикалық олимпиада өтуде. Олимпиадаға құрамында барлығы 76 оқушы бар 23 команда қатысуда, деп хабарлайды kazlenta.kz тілшісі ҚР Оқу-ағарту министрлігіне сілтеме жасап.
Олимпиаданың мақсаты - дарынды балаларды анықтау және қолдау көрсету, теориялық білім мен практикалық дағдыларын тереңдету, химия пәнін оқуға қызығушылығын арттыру.«Олимпиада теориялық және практикалық екі кезеңнен тұрады. Теориялық кезең 9-сыныптың химия курсын толығымен қамтиды және мұнда 8 тапсырма беріледі. Практикалық кезең заттардың химиялық қасиеттерін анықтауға арналған. Айта кететін жайт, сайыс классикалық форматта өтеді. Академиялық адалдықты қамтамасыз ету үшін олимпиада қатысушының деректері қазылар алқасына көрсетілмейді. Әр кезеңнен кейін тапсырмалардың сканерленген нұсқалары, оқушылар жұмысы және дұрыс жауаптар орталықтың сайтында жарияланады. YouTube арнасында тікелей эфир және түсірілім жүргізіледі», - дейді «Дарын» республикалық ғылыми-практикалық орталығының директоры Ғаждембек Тұрсынов.
Қорытындылар мен жеңімпаздарды марапаттау рәсімі ертеңге жоспарланған.