Астанада полиция ойын-сауық орындарында рейд жүргізді, деп хабарлайды kazlenta.kz тілшісі Polisia.kz сайтына сілтеме жасап.
Астанада қоғамдық тәртіпті сақтау мен құқық бұзушылықтардың жолын кесу мақсатында полиция қызметкерлері Нұра ауданындағы ойын-сауық орындарында рейд жүргізді. Тексеру барысында бірқатар заң бұзушылықтар анықталып, құқық бұзушыларға қатысты тиісті шаралар қабылданды. Рейд нәтижесінде 38 әкімшілік құқық бұзушылық тіркелді. Оның ішінде ҚР Әкімшілік құқық бұзушылық туралы кодексінің 441-бабының 1-бөлігі бойынша — 30, ал 3-бөлігі бойынша 8 факті анықталды. Сонымен қатар алкогольдік ішімдіктерді тұтыну, кәмелетке толмағандардың заңды мүдделерін қорғау және ата-аналардың бала тәрбиесіне қатысты міндеттерін орындауы бағытында да тексеру жүргізіліп, әкімшілік хаттама толтырылды.
Полицияның басты мақсаты — жазалау емес, құқық бұзушылықтардың алдын алу және азаматтардың қауіпсіздігін қамтамасыз ету. Осы бағыттағы рейдтік іс-шаралар қоғамдық тәртіпті нығайтуға, заң талаптарының сақталуын бақылауға және құқық бұзушылықтарға жол бермеуге бағытталған. Полиция ойын-сауық орындарының әкімшіліктерін заң талаптарын қатаң сақтауға, ал азаматтарды қоғамдық тәртіпке құрметпен қарауға шақырады.