2026 жылдың басынан бері Астанада мансап орталықтары арқылы 8 183 жас жұмыспен қамтуға жәрдемдесу шараларымен қамтылды. Оның ішінде 3 547 жас тұрақты жұмысқа орналасты. Жұмысқа орналасуға жәрдемдесумен қатар, жастарға кәсіби кеңес беру, бос жұмыс орындарын таңдауға көмектесу, «Жастар практикасы» бағдарламасына қатысу және басқа да қолдау шаралары қолжетімді. Бұл туралы елорданың Коммуникациялар қызметінде өткен брифингте Астана қаласы Еңбек мобильділігі орталығының директоры Олжас Омар мәлімдеді, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Түлектер мен жас мамандарды қолдаудың маңызды тетіктерінің бірі – «Жастар практикасы» бағдарламасы.
«Қазіргі уақытта бағдарлама аясында 209 ұйымнан 529 бос жұмыс орны ұсынылып отыр. Сұранысқа ие мамандықтардың қатарында заңгер, бухгалтер, жүйелік әкімші, қаржыгер, қаржы талдаушысы, экономист және журналист бар.
Бағдарламаға қатысатын ұйымдардың қатарында «Қазақстан» республикалық телерадиокорпорациясы» АҚ, «Astana Innovations» АҚ, «Астана-Энергия» АҚ, «Kazakh Invest» ұлттық компаниясы» АҚ, «Электр энергиясы мен қуаты нарығының қазақстандық операторы» АҚ, Қазақстан Республикасының Қаржылық мониторинг агенттігі, Сыртқы істер министрлігі, Энергетика министрлігі, Ғылым және жоғары білім министрлігі, Көлік министрлігі, сондай-ақ бірқатар мемлекеттік және жеке ұйымдар бар.
2026 жылға арналған «Жастар практикасы» бағдарламасы бойынша жұмыс орындарын ұйымдастыру үшін жұмыс берушілерден өтінім қабылдау биылғы қазан айының соңына дейін жалғасады», – деді Олжас Омар.
Оның айтуынша, жыл басынан бері Астанада жұмысқа орналасу мүмкіндіктерін кеңейту және жұмыс берушілер мен жас мамандар арасында тікелей байланыс орнату мақсатында 30 бос жұмыс орындары жәрмеңкесі өткізілді. Оның алтауы жоғары оқу орындары мен техникалық және кәсіптік білім беру ұйымдарының түлектеріне арналған мамандандырылған жәрмеңкелер болды.
Жұмыс іздеушілерге Enbek.kz порталы да қосымша мүмкіндіктер ұсынады. Жыл басынан бері порталда 94 236 жұмыс орнын қамтитын 43 713 бос жұмыс орны туралы хабарландыру жарияланды. Қазіргі уақытта 6 200 жұмыс берушіден 12 897 өзекті бос жұмыс орны ұсынылып отыр.
«Астанада жастарды жұмыспен қамтуға жәрдемдесу, олардың кәсіби мүмкіндіктерін дамыту және еңбек нарығына қатысуын кеңейту бағытында жүйелі жұмыс жүргізіліп келеді. Негізгі назар жұмыс іздеудің қолжетімді жолдарын қалыптастыруға, жас мамандар мен жұмыс берушілер арасындағы байланысты нығайтуға және алғашқы кәсіби тәжірибе жинауға қолдау көрсетуге аударылып отыр», – деп қорытындылады Олжас Омар.