Қасым-Жомарт Тоқаев Қазақстан халқына Жолдауында Ауыл шаруашылығы ғылымын дамытудың нақты жоспары қажет екенін атап өтті, деп хабарлайды kazlenta.kz тілшісі Ақордаға сілтеме жасап.
Президенттің айтуынша, қолданбалы аграрлық ғылымды жедел дамыту агроөнеркәсіп кешенін ұзақ мерзімді қарқынды өркендетудің басты шарты. Алайда, бюджеттен қомақты қаражат бөлінгеніне қарамастан, ауыл шаруашылығы ғылымының нәтижелілігі төмен деңгейде қалып отыр. Мәселен, ғылыми әзірлемелердің коммерциялануы 17 пайыздан аспайды, ал аграрлық жоғары оқу орындарын тәмамдаған түлектердің тек 40 пайызы ғана салада еңбек етеді.«Агроғылым мен «жердегі тіршіліктің» арасында алшақтық бар. Мен бұған дейін Ұлттық аграрлық ғылыми-білім беру орталығын агротехнология хабы ретінде қайта құру туралы тапсырма бердім. Ауыл шаруашылығы ғылымын дамытудың нақты жоспары қажет. Бұл құжат цифрлық технологияларды қолдануға және осы саланың өнімділігін едәуір арттыруға арналған жоспар болуға тиіс.Ветеринария мен фитопатологияның кенжелеп қалуы агроөнеркәсіп кешенінің бәсекеге қабілетін айтарлықтай шектеп отыр. Осы мәселеге айрықша назар аударған жөн», деді Қасым-Жомарт Тоқаев.