Атырауда шартты түрде мерзімінен бұрын босатылған азамат қайта қамауға алынды, - деп хабарлайды kazlenta.kz тілшісі Polisia.kz сайтына сілтеме жасап.
Атырау қаласында полиция қызметкерлері құқық бұзушылықтардың алдын алу және қоғамдық тәртіпті сақтау мақсатында 10-23 ақпан аралығында "Есепте тұрған тұлғалар" жедел-профилактикалық іс-шарасын өткізіп жатыр. Іс-шара барысында №5 учаскелік полиция пунктінің қызметкерлері бұрын сотталған азаматтарды тексеру кезінде 24 жастағы азаматтың тәртіп талаптарын өрескел бұзғанын анықтады. Ол шартты түрде мерзімінен бұрын босатылғанына қарамастан, соңғы екі айда бірнеше рет құқық бұзушылық жасап, ішкі істер органдарының ескертулеріне құлақ аспаған.
Тексеру барысында оның пробациялық бақылау талаптарын жүйелі түрде елемегені белгілі болды. Ол белгіленген шектеулерді сақтамай, түнгі уақытта үйінде болмаған, тұрғылықты мекенжайын өз бетінше тастап кеткен, сондай-ақ полицияға хабарламай, заңсыз түрде қала аумағынан шыққан. Бұдан бөлек, азамат өзінің жақын туысына тұрмыстық жанжал шығарып, моральдық және материалдық залал келтірген. Сондай-ақ ол азаматшаның банк картасынан оның келісімінсіз ақша шешіп алған. Жауапкершіліктен сабақ алмаған ол, есепте тұрған кезінде де қайтадан ұрлық жасап, қылмыстық жауапкершілікке тартылған.
Бұған дейін бірнеше рет тонау, ұрлық және көлік құралын заңсыз иемдену қылмыстары үшін сотталғанын ескерген полиция қызметкерлері, оның шартты түрде босатуын жою және қайта қамауға алу туралы сотқа ұсыныс жолдады. 14 ақпан күні сот шешімімен құқық бұзушылықтарға жол берген азаматтың шартты түрде босатылуы жойылып, ол қайтадан түзеу мекемесіне жіберілді. Атырау полициясы қоғамдық тәртіпті бұзған әр азамат заң алдында жауап беретініне назар аудара отырып, құқық қорғау органдарының талаптарын қатаң сақтауды ескертеді.