Көлік полицейлері Тараз тұрғындарынан аса ірі мөлшерде қарасора тәркіледі, – деп хабарлайды kazlenta.kz тілшісі Polisia.kz сайтына сілтеме жасап.
Қарасора жедел алдын алу іс-шараларын жүргізу барысында Шу – Аспара станцияларының аралығында есірткі заттарын жинап жүрген Тараз қаласының 3 тұрғыны анықталып, ұсталды. Олардан спецификалық иісі бар, жасыл түсті өсімдік тектес зат салынған бір қапшық табылып, тәркіленді.
Құқық бұзушылардың бірі бұрын ҚР ҚК-нің 188-бабы (Ұрлық) және 296-бабы (Есірткі, психотроптық заттармен, сол тектестермен өткізу мақсатынсыз заңсыз жұмыс істеу) бойынша сотталған. Сот-сараптамалық зерттеудің қорытындысына сәйкес, тәркіленген зат жалпы салмағы 16,4 келіні құрайтын, яғни аса ірі мөлшердегі кептірілмеген қарасора есірткі заты болып шықты.
Аталған факт бойынша ҚР Қылмыстық кодексінің 296-бабы 4-бөлігі бойынша сотқа дейінгі тергеу басталды. Қазіргі уақытта сот ұсталғандарға қатысты 2 ай мерзімге қамауда ұстау түріндегі бұлтартпау шарасына санкция берді, тергеу амалдары жүргізіліп жатыр.