СҚО прокуратурасы «Олимп» және «Дельфин» балалар мен жасөспірімдер спорт мектептерінде тексеріс жүргізді, деп хабарлайды kazlenta.kz тілшісі ҚазАқпарат сайтына сілтеме жасап.
Тексеру барысында еңбек заңнамасын бұзу фактілерімен қатар, «Дельфинде» біліктілік санатын заңсыз беру, «Олимпте» оқушыларды шешіну орындарымен, спорт жабдықтарымен қамтамасыз етпеу, жаттықтырушы ретінде жұмысқа заңсыз алынған адамдарға негізсіз жалақы төлеу фактілері анықталды.
Анықталған кемшіліктер бойынша облыс әкімдігінің атына, дене шынықтыру және спорт басқармасына қадағалау актілері енгізілді.
Оны қарау қорытындысы бойынша бюджетке 6,8 млн теңге қайтарылды.
14 тұлға әртүрлі жауапкершілікке тартылған, 4 тұлға атқарған лауазымынан босатылып, 2 адам біліктілік санатынан айырылды.
Сондай-ақ дене шынықтыру және спорт басқармасының бастығы Сергей Мелеховке сөгіс берілді.
Еңбек заңнамасын бұзу бойынша кінәлі тұлғалар әкімшілік жауапкершілікке тартылды.
Еңбекақыны негізсіз есептеу бөлігіндегі негізсіз ақша жинау, жұмысқа заңсыз алу бойынша тексеріс материалдары процестік шешім қабылдау үшін құқық қорғау органдарына (ПБ, ЭТД) берілген.
Спортшылардың жарысқа жарамдылығы туралы анықтамаға дәрігердің қолын қою фактілері және банкке қайырымдылық көмек көрсету туралы хаты бойынша Петропавл полиция басқармасы сотқа дейінгі тергеу бастады.