Қазақстан-Өзбекстан ынтымақтастық жөніндегі үкіметаралық комиссияның XX отырысы аясында бірлескен жобаларды қолдауға байланысты жеңіл өнеркәсіпті дамытудың бағдарламасын әзірлеу туралы шешім қабылданды, деп хабарлайды kazlenta.kz.
Таяуда жоғарыда аталған бағдарламаны әзірлеу мақсатында ҚР Индустрия және инфрақұрылымдық даму министрлігі Шымкент қаласы мен Түркістан облысының әкімдіктері және қаржы институттарымен бірлесіп, өзбекстандық делегациямен кездесу өткізді. Оның құрамында ӨР Инвестициялар, өнеркәсіп және сауда министрлігінің, «Узчармсаноат», «Узтекстильпром» қауымдастықтарының, сондай-ақ 50-ден астам кәсіпорынның өкілдері болды.
Кездесуде мемлекеттік органдардың өкілдері мен қаржы институттары Қазақстандағы инвестициялық ахуалға қатысты тың мәліметтерді жеткізді. Бұған қоса бауырлас елдің іскер азаматтары «Оңтүстік» арнайы экономикалық аймағы мен «Түркістан» индустриялық аймағын, сонымен бірге мақта өңдейтін, иірілген жіп пен мата өндіретін, кілем бұйымдары мен аяқ киім шығаратын кәсіпорындарды (Azala Textile ЖШС, «Бал Текстиль» ЖШС, «СП «Lux Shoes» ЖШС, «Барс» ЖШС, «СП «Turkestan textile» ЖШС) аралап шықты.
Сонымен қатар екі елдің кәсіпорындар үшін B2B, B2G форматтарына сәйкес кездесулер ұйымдастырылып, оның барысында Шымкент пен Түркістан облысының инвестициялық әлеуеті таныстырылды. Тараптар ірі қараның терісін өңдеу, мақтаны дайын өнімге дейін терең өңдеу бойынша бірлескен жобаларды құру мүмкіндіктерін қарастырды.
«Жеңіл өнеркәсіп саласындағы өндіріс қуатын арттырып, терең өңдеуге көшуді көздейтін көрсеткіштерімізді жақсартуға бағытталған өзара тиімді ынтымақтастықты нығайтуға мүдделіміз», деді ҚР ИИДМ Индустриялық даму комитеті төрағасының орынбасары Олжас Сапарбеков.