Алматы әкімдігі терренкур маңындағы жанжалды учаскені мемлекет меншігіне қайтарды. Бұл туралы Медеу ауданының тұрғындарымен кездесуінде мегаполис басшысы Ерболат Досаев айтты, - деп хабарлайды kazlenta.kz тілшісі Tengrinews.kz сайтына сілтеме жасап.
Қала әкімінің айтуынша, терренкурдегі су қоймасының жоғарғы бөлігі қазір мемлекет меншігінде. Ол иелік ететін жеке тұлғалардан сатып алынған.
Кейінірек әкімдіктің баспасөз қызметі бұл биылғы көктемде алматылықтар даулаған жер екенін растады."Аудандағы қоғамдық орындарды дамыту аясында терренкурдағы су қоймасының жоғарғы бөлігі мемлекет меншігіне қайтарылды. Бүгінде оны қайта құрудың жобалық-сметалық құжаттары әзірленіп жатыр. Сондай-ақ, терренкурдағы жөндеу жұмыстары биыл жыл аяғына дейін жүргізіледі", - деді Досаев.