«ҚазМұнайГаз» ҰК» АҚ Үкіметтің компания акцияларын бәсекелес ортаға берудің кейбір мәселелері туралы қаулысына түсінік берді, деп хабарлайды ҚазАқпарат-қа сілтеме жасаған kazlenta.kz
«2022 жылдың 5 қарашасында қабылданған Үкімет қаулысы жекешелендіру аясында жалпы иеліктен шығарылуы мүмкін (2022 жылғы ІРО аясында ғана емес, сонымен бірге келешекте құнды қағаздардың ұйымдастырылған нарығында компания акцияларын әлеуетті ұсынуға орай) акциялардың максималды санына қатысты», - деп атап өтті ҚазАқпарат сауалына түсініктеме берген компания баспасөз қызметінен.
«ҚазМұнайГаз» компаниясының нақтылай түсуінше, осы ұсыныс аясында «Самұрық-Қазына» АҚ-қа тиесілі акциялардың 5 пайыздан аспайтын мөлшерін сату жоспарланған.
Алдағы уақытта акциялардың нақты саны, құрылымы мен құны өтінімдерді жинау аяқталғаннан кейін Үкімет қаулысымен бекітіледі.
Кеше «ҚазМұнайгаз» компаниясы акцияларын халықтық ІРО-ға шығаруға жол ашатын Үкімет қаулысы жарияланған болатын.
Айта кетерлігі, таяуда «Самұрық-Қазына» АҚ басқарма төрағасы Алмасадам Сәтқалиев қор «ҚазМұнайГаздың» 30 505 974 жай акциясын сатуға ниетті екенін айтқан еді.
Бұл ретте бір жай акцияның бағасы шамамен 8 406 теңге болмақ.