Мемлекет басшысы Қасым-Жомарт Тоқаев Жаңа Қазақстанды құруда жас буынға үлкен үміт артатыны туралы Жолдауда баса айтты. Жастарға жан-жақты қолдау мемлекетіміздің басты міндеттерінің бірі екенін айтып, келесі жылы 100 мың жастың жұмыспен қамтылатынын жеткізді.
Жас кәсіпкерлерге қолдау көрсету мақсатында оларға жеңілдетілген тәртіппен 2,5 пайыз болатын шағын несие беріледі. Алдағы уақытта шағын бизнес те жастардың тың бастамаларымен жаңа деңгейге көтерілмек. Бұл туралы бүгін Шымкент қаласындағы Ж.Тәшенов университетінде «Аманат» партиясы ШҚФ Атқарушы хатшысының орынбасары Мұратәлі Қалмұратов студенттермен кездесуінде мəлім етті. Кездесуде ол, жастармен бірге Жолдауды жүзеге асыру жайында пікірлесті.
Естеріңізге сала кетейік, Президент жолдауының үшінші бағыты: жас ұрпақтың денсаулығын нығайту, сапалы білім алуы мен жұмыспен қамту және жас кәсіпкерлерді қолдауға арналған. Кездесу барысында Мұратәлі Оразалыұлы берекелі қоғам бастауы жастар екенін айта келе, алда үлкен мүмкіндіктерге жол ашылатынын жеткізді. Жас буын өкілдері де өздерін толғандырған сауалдарын жолдап, емен-жарқын əңгіме өрбітті.
Шым шаһар үшінші мегаполис ретінде жастардың ең көп шоғырланған аймағы саналады. Жəне қалада бірнеше жоғарғы жəне орта арнаулы оқу орындары бар. Оларды тəмамдаған түлектер тұрақты жұмыспен қамтылып, өз кəсібін ашуға, жарқын да табысты болашақта өмір сүруге мүдделі. Жолдаудың көздегені де осы. Бастаманы білімді де білікті жастармен бірге жүзеге асыру, олардың мақсаттарына қанат бітіріп дем беру. Сондықтан жас буынмен бірге Жаңа Қазақстанды құруда атқарылар шаруа қыруар болмақ.