Бүгін, 12 қыркүйек күні Алматы облысының "Жетіген – Құрөзек" аралығында темір жолдан өтіп бара жатқан бір отар қойдың 123-ін жүк пойызы қағып кетті, деп хабарлайды Көліктегі полиция департаменті Instagram парақшасында.
Ведомствоның хабарлауынша, оқиға бүгін, 12 қыркүйек күні сағат 01.24-те Алматы облысында болған. "Бүгін, 12 қыркүйек күні Алматы облысының "Жетіген – Құрөзек" аралығында жүк пойызының машинисі темір жолдан өтіп бара жатқан бір отар қойды байқап, шұғыл тежеу қолданған. Алайда, қақтығыстың алдын алу мүмкін болмады. Соның салдарынан 530 бас қойдың 123-і пойыз астына түсіп өлді. Пойыздың тұрағы 13 минутты құрады", – деді Көліктегі полиция департаментінің бастығы Оңал Бекеев.
Оның айтуынша, оқиға орнына Алтынкөл стансасындағы Желілік полиция бөлімшесінің қызметкерлері бірден жетіп, жүргізілген іс-шаралар барысында малдың иесін анықтаған. Ол Алматы облысы Туғанбай ауылының 36 жастағы тұрғыны болып шықты. "Аталған азамат ӘҚБтК 559-бабының 1-бөлігі, яғни темiржолдардың бөлінген жолағында мал жаю қағидаларын бұзу бойынша әкімшілік жауапкершілікке тартылды", – деді полиция генерал-майоры.
13-09-2022, 13:12
Алматы облысында жүк пойызы жүздеген қойды қағып кетті
Егер мәтінде қате байқасаңыз, оны таңдап, Ctrl+Enter пернелерін басыңыз