Атырау темір жол станциясындағы желілік полиция бөлімінің ақпарат агенттігіне хабарлауынша, қайғылы оқиға 6 шілдеде сағат 17:00 шамасында болған. Жергілікті колледждің студенті жолды қысқарту үшін "Қара депо" шағын ауданындағы теміржолды кесіп өтпек болған. Жасөспірімді
"Ақжайық-Теңдік" теміржол өткелінде тепловоз қағып кеткен. Машинистің айтуынша, теміржол бойында келе жатқан адамды байқаған. Алайда тежегішті басқанымен, тепловозды тоқтатып үлгермеген. "Қазір аталған дерекке байланысты Қылмыстық кодекстің 344-бабы 2-бөлігімен (Абайсызда адам өліміне әкеп соққан темір жол көлігі қозғалысы немесе оны пайдалану қауіпсіздігі қағидаларын бұзу) сотқа дейінгі тергеу жүргізіліп жатыр. Өзге ақпарат Қылмыстық-процестік кодексінің 201-бабының талаптарына сәйкес тергеу мүддесіне орай жария етуге жатпайды", - деп хабарлаған агенттікке көліктегі полиция департаментінің баспасөз қызметі.