Түркияның Анкара қаласында Қазақ ұлттық қыздар педагогикалық университетінің ұйымдастыруымен және Қазақстанның Түркиядағы Елшілігінің қатысуымен «Түркі әлеміндегі құрылтай дәстүрі: тарихи жады және мемлекеттілік» атты халықаралық ғылыми-мәдени іс-шара өтті. Іс-шара аясында университеттің «Ұлы Дала тарихы» ғылыми-зерттеу орталығы әзірлеген «Құрылтай феномені» кітабының түрік тіліндегі нұсқасы таныстырылды, деп хабарлайды kazlenta.kz тілшісі ҚР Ғылым және жоғары білім министрлігіне сілтеме жасап.
Жиынға Қазақстанның Түркиядағы Төтенше және Өкілетті Елшісі Еркебұлан Сәпиев, мемлекет және қоғам қайраткері Әділ Ахметов, Түркия Ұлы Ұлттық Мәжілісінің депутаты, Әділет және даму партиясы төрағасының орынбасары Күршад Зорлу, сондай-ақ Түркияның жоғары оқу орындарының ғалымдары қатысты.
Ғылыми отырыс барысында Анкара Қажы Байрам Вели университетінің профессоры Фырат Пурташ, Хажеттепе университетінің профессоры Сейфи Йылдырым және Нийде Өмер Халисдемир университетінің профессоры Мехмет Екиз баяндамалар жасады. Қатысушылар құрылтай дәстүрінің тарихи бастауларын, оның түркі халықтарының саяси мәдениеті мен мемлекеттілік тарихындағы орнын талқылап, ортақ тарихи мұраны ғылыми тұрғыдан зерделеу мен халықаралық академиялық ынтымақтастықты дамытудың маңызын атап өтті.
Жоба жетекшісі, мемлекет және қоғам қайраткері, экономика ғылымдарының докторы Омархан Өксікбаев зерттеудің негізгі нәтижелері мен ғылыми маңызын таныстырды. Оның айтуынша, кітаптың түрік тілінде жарық көруі қазақ халқының тарихи-мәдени мұрасын халықаралық ғылыми қауымдастыққа танытуға, сондай-ақ түркі халықтары арасындағы рухани және академиялық байланыстарды нығайтуға мүмкіндік береді.
«Құрылтай феномені» зерттеуі Омархан Өксікбаев пен шығыстанушы, түрколог-лингвист ғалым Зәріпбай Оразбайдың бірлескен ғылыми ізденістерінің нәтижесінде дайындалған. Кітаптың түрік тіліндегі нұсқасының таныстырылуы қазақ халқының тарихи мұрасын халықаралық деңгейде насихаттауға, түркі дүниесіне ортақ құндылықтарды зерделеуге және Қазақстан мен Түркия арасындағы ғылыми-мәдени ынтымақтастықты кеңейтуге бағытталған маңызды қадам болды.