Алматының Наурызбай ауданында 2026 жылдың соңына дейін үш жаңа балабақша ашу жоспарланып отыр. Нысандардағы құрылыс жұмыстары толық аяқталған. Қазір оларды пайдалануға беру үшін қажетті құжаттар рәсімделіп жатыр. Бұл туралы Алматы қаласының Өңірлік коммуникациялар қызметінде өткен брифингте Наурызбай ауданының әкімі Нәзира Тоғызбаева мәлімдеді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Жаңа мектепке дейінгі ұйымдар Қалқаман және Құрамыс шағынаудандарында, сондай-ақ «Нұрлы Дала» тұрғын үй кешенінде орналасқан. Қалқамандағы №207 балабақша 240 орынға, Құрамыстағы №203 және «Нұрлы Дала» ТК-дегі №204 балабақшалардың әрқайсысы 320 орынға есептелген.
2025 жылы қыркүйекте Шұғыла шағынауданында 320 орындық балабақша пайдалануға берілген болатын.
Ауданда мектеп инфрақұрылымы да кеңейіп келеді. 2025 жылы Шұғыла және Құрамыс шағынаудандарында жалпы сыйымдылығы 5 500 орын болатын үш жаңа мектеп пайдалануға берілді.
2026 жылы әрқайсысы 1 200 орынға арналған №223 және №41 жалпы білім беретін мектептер, сондай-ақ 340 орындық №15 санаторийлік мектеп-интернат ашылды. Бұдан бөлек, 375 орынға арналған №174 мектеп-гимназиясының қосымша ғимараты пайдалануға берілді.