21-27 қыркүйек аралығында Атырау қаласында патрульдік полиция қызметкерлері жол қозғалысы қауіпсіздігі мен қоғамдық тәртіпті қамтамасыз ету бағытында жүргізілген іс-шаралар барысында 1920 әкімшілік құқық бұзушылықты анықтап, 89 автокөлік арнаулы тұраққа қойылды, деп хабарлайды kazlenta.kz тілшісі Polisia.kz сайтына сілтеме жасап.
Мысалы 21 қыркүйекке қараған түні Маденов көшесінде BMW M5 автокөлігін басқарған 20 жастағы жүргізуші бірден бірнеше жол қозғалысы талабын бұзған. Тексеру барысында оның қарсы бағытқа шығып, қос тұтас сызықты кескені, тіркеу тәртібін сақтамағаны және міндетті сақтандыру полисінсіз көлік басқарғаны анықталды. Сонымен қатар көлікте өрт сөндіргіш пен авариялық дәрі қобдишасы болмаған. Жүргізуші маневр жасау талаптарын бұзып, жол жамылғысын да ластаған.
Аталған құқық бұзушылықтардың әрқайсысы бойынша жүргізуші әкімшілік жауапкершілікке тартылып, автокөлігі арнаулы тұраққа қойылды. 25 қыркүйек күні Сұлтан Бейбарыс көшесінде заңсыз қайта жабдықталған Nissan Silvia автокөлігі анықталып, заңнама аясында шарасы алынды. Полиция азаматтарды жол қозғалысы ережелері мен қоғамдық тәртіп талаптарын сақтауға, көлік құралдарын техникалық талаптарға сай пайдалануға және қауіпсіздік шараларына жауапкершілікпен қарауға шақырады.