Көліктегі полиция 71 мыңнан астам әкімшілік құқық бұзушылықтың жолын кесті, деп хабарлайды kazlenta.kz тілшісі Polisia.kz сайтына сілтеме жасап.
Жыл басынан бері көліктегі полиция департаментінің қызметкерлері 71 223 әкімшілік құқық бұзушылықты анықтап, жолын кесті. Оның ішінде алкогольдік ішімдіктерді ішу немесе қоғамдық орындарға масаң күйінде келгені үшін 5 407 факті, темекі шегуге белгіленген тыйымды бұзудың 3 217 фактісі, сондай-ақ ортақ пайдаланылатын орындарды ластаудың 1 999 фактісі (қоқыс, темекі тұқылын тастау және өзге де құқық бұзушылықтар) тіркелді. Мәселен, елорда әуежайында Франкфурт – Астана бағытындағы әуе рейсінің командирі актісімен көліктегі полиция басқармасының қызметкерлері шетелдің 50 жастағы азаматын рейстен түсіріп алды.
Ұшу барысында жолаушы авиациялық қауіпсіздік талаптарын елемей, әуе кемесінің дәретханасында темекі шеккен. Аталған құқық бұзушылық үшін шетел азаматы жауапкершілікке тартылды. Теміржол көлігінде де қоғамдық тәртіпті бұзудың осындай фактісі тіркелді. Ақтөбе облысы Никельтау станциясында Маңғыстау – Семей бағытындағы пойыздың 19 жастағы жолаушысына ортақ пайдаланылатын орындарды ластаған.
Жас жігіт пойыз аялдаған кезде перронда болып, темекі тұқылдарын арнайы белгіленбеген жерге тастағаны үшін жауапкершілікке тартылды. Көлік полицейлері еске салады: әуе және теміржол көлігі нысандарында белгіленген тәртіпті сақтау – жолаушылардың қауіпсіздігі, тазалығы мен жайлылығының кепілі. Белгіленбеген орындарда темекі шегу, аумақты ластау және өзге де құқық бұзушылықтар заңда белгіленген тәртіппен жазаланады. "Таза Қазақстан" жалпыұлттық бастамасы аясында полиция азаматтарды қоршаған ортаға ұқыпты қарап, тазалықты сақтауға шақырады.