Көлік полицейлері жыл басынан бері әуе кемелерінде 63 құқық бұзушылықтың жолын кесті, — деп хабарлайды kazlenta.kz тілшісі Polisia.kz сайтына сілтеме жасап.
Көлік полицейлері әуе және теміржол көлігіндегі қауіпсіздікті үздіксіз қамтамасыз етіп, профилактикалық жұмыс жүргізеді. Соған қарамастан кейбір азаматтар заң талаптарын елемей, құқық бұзушылыққа жол береді. Соның бірі Бангкок – Шымкент рейсінде болған. Бангкок – Шымкент бағыты бойынша ұшып келген әуе рейсі қонғаннан кейін әуе компаниясы өкілдерінің актісі негізінде рейс барысында қоғамдық тәртіпті бұзған жолаушы Шымкент қаласы әуежайындағы көліктегі полиция бөлімінің қызметкерлеріне тапсырылды.
Тексеру барысында көлік полицейлері құқық бұзушының 59 жастағы шетел азаматы екенін анықтады. Ол ұшу кезінде темекі өнімдерін тұтынуға тыйым салынғанына қарамастан, әуе кемесінің бортында темекі шеккен. Аталған құқық бұзушылық үшін шетел азаматы жауапкершілікке тартылды. Еске сала кетейік, жыл басынан бері көліктегі полиция департаментінің қызметкерлері әуе кемелерінің бортында жасалған 63 әкімшілік құқық бұзушылықты анықтады. Оның ішінде 42 дерек алкогольдік ішімдіктерді ішуге және қоғамдық орындарға масаң күйде келуге қатысты болса, 8 дерек ұсақ бұзақылыққа, 7 факт ұшақ бортында темекі шегуге байланысты тіркелген. Сондай-ақ өзге де құқық бұзушылықтар анықталып, жолы кесілді.