Елордада балалардың қауіпсіздігін қамтамасыз етуге бағытталған "Назар аударыңыз – балалар!" жедел-профилактикалық іс-шарасы жалғасып жатыр, деп хабарлайды kazlenta.kz тілшісі Polisia.kz сайтына сілтеме жасап.
Іс-шара аясында полиция қызметкерлері кәмелетке толмағандардың түнгі уақытта заңды өкілдерінің қарауынсыз жүруіне жол бермеу мақсатында рейдтік жұмыстар жүргізуде. Қызметкерлер ойын-сауық орындарын, компьютерлік клубтарды және өзге де қоғамдық орындарды тексеріп, заң талаптарының сақталуын бақылайды. Кезекті рейд барысында елордалық полицейлер компьютерлік клубтардың бірінен түнгі уақытта жүрген 15 жастағы жасөспірімді анықтады.
Тексеру кезінде оның заңды өкілінің қарауынсыз болғаны белгілі болды. Осыған байланысты жасөспірімнің ата-анасы жауапқа тартылды. Сонымен қатар кәмелетке толмағанның түнгі уақытта компьютерлік клубта болуына жол берген мекеме иесі де заңнамада көзделген жауапкершілікке тартылды. Полиция ата-аналарға баланың бос уақытын бақылауда ұстап, оның қайда және кіммен жүргеніне назар аударудың маңызын ескертеді.