Еңбек және халықты әлеуметтік қорғау министрлігі құрылыс саласында өндірістік жарақаттың алдын алу жұмыстарын күшейтіп жатыр. Негізгі мақсат жазатайым оқиғаларға жол бермеу, еңбек қауіпсіздігі талаптарының бұзылуын дер кезінде анықтау және жұмысшылардың қауіпсіздігіне құрылыс компаниялары мен бас мердігерлердің жауапкершілігін арттыру, деп хабарлайды kazlenta.kz тілшісі ҚР ЕХӘҚМ баспасөз қызметіне сілтеме жасап.
Елордада мемлекеттік еңбек инспекторлары құрылыс нысандарындағы еңбек қауіпсіздігі мен еңбекті қорғау талаптарының сақталуын бақылауға алды.
Төтенше жағдайлар департаменті, полиция департаменті және Кәсіподақтар орталығы бірлесіп құрылыс алаңдарында тұрақты түрде көшпелі мониторинг пен профилактикалық іс-шаралар өткізеді.
Өндірістік жарақат қаупі жоғары нысандар мен жұмыстарға ерекше назар аударылмақ. Бұзушылықтардың алдын алу үшін министрлік Астанадағы құрылыс компанияларына еңбек қауіпсіздігіне ішкі бақылауды күшейту жөнінде ұсынымдар да жолдады. Бұл жұмыс құрылыс саласындағы шамамен 20 мың субъекті қамтиды.
Атап айтқанда, жұмыс берушілерге:
- компания басшылығынан бастап әрбір құрылыс алаңына дейін еңбек қауіпсіздігі талаптарының сақталуын жүйелі түрде бақылауды;
- қауіптілігі жоғары жұмыстарды атқарған кезде жауапты мамандардың міндетті түрде болуын;
- еңбек қауіпсіздігі және еңбекті қорғау жөніндегі өндірістік кеңестер құрып, техникалық инспекторлардың жұмысын қолдауды;
- қызметкерлерге қосымша әлеуметтік кепілдіктер қарастыратын ұжымдық шарттар жасасуды ұсынды.
Құрылыс алаңындағы қауіпсіздік – жұмыс берушінің тікелей жауапкершілігі. Еңбекті қорғау талаптарының орындалуы қағаз жүзіндегі талаппен шектелмей, жұмыстың барлық кезеңінде қамтамасыз етілуі қажет.
Еңбек министрлігі өндірістік жарақаттың алдын алу мен бақылау жұмыстарын одан әрі күшейтеді. Басты міндет жазатайым оқиғаларға жол бермеу және әрбір жұмысшы үшін қауіпсіз еңбек жағдайын қамтамасыз ету.