Астанада жаңа 2026-2027 оқу жылында жалпы білім беретін мектептердің бірінші сыныбына 33 мыңға жуық бала қабылданды, деп хабарлайды kazlenta.kz тілшісі Астана қаласы әкімдігінің ресми сайтына сілтеме жасап.
Биыл елордадағы 206 орта білім беру ұйымында 337 мыңнан астам оқушы білім алады.Оқу жылының басталуына орай Астанадағы №13, №41, №72, №73, №79, №82 және №86 мектептер жанынан жеті қосымша оқу ғимараты, сондай-ақ екі мектеп ашылды. Жаңа ғимараттарда оқу кабинеттері, асханалар, спорт залдары мен коворкинг аймақтары қарастырылған. Мұнда негізінен 1-4 сынып оқушылары білім алады.
Қосымша ғимараттардың ашылуы мектептердегі жүктемені азайтып, оқушы орындарының тапшылығын азайтуға мүмкіндік береді. Жалпы соңғы жылдары Астанада 100 мыңнан астам оқушыға арналған 44 жаңа мектеп пайдалануға берілді. Оның 23-і «Келешек мектептері» жобасы аясында салынған. Сонымен қатар жаңа оқу жылына дайындық барысында 38 білім беру ұйымында жөндеу жүргізілді. Барлық білім беру нысаны алдағы жылу беру маусымына дайындалып, тиісті дайындық паспорттарын алды.
Оқушыларды оқулықтармен және оқу-әдістемелік кешендермен қамтамасыз ету үшін 14 баспадан 1,2 млн данадан астам кітап сатып алынды.Мемлекеттік мектептердің бастауыш сынып оқушылары мен әлеуметтік осал санаттағы балалар тегін ыстық тамақпен толық қамтылды. Биыл мектептерде жаңартылған ас мәзірі енгізіліп, тамақтану сапасын бақылау жұмысы қоғам өкілдері мен сарапшыларды тарта отырып күшейтілді.