Алматыдағы пәтерлердің бірінде жұмыс істеп тұрған вебкам-студия қызметі әшкере болды. Полиция жедел іс-шаралар барысында онлайн-трансляцияда отырған қыз бен студия әкімшісінің үстінен түсті, - деп хабарлайды kazlenta.kz тілшісі Tengrinews.kz сайтына сілтеме жасап.
Полиция мәліметінше, операцияны Киберқылмысқа қарсы іс-қимыл басқармасы мен Медеу аудандық полиция бөлімінің қызметкерлері бірлесіп жүргізген. Тергеу деректеріне сәйкес, пәтер интим сипаттағы ақылы интернет-трансляциялар жүргізу үшін арнайы жабдықталған.
Тінту кезінде құқық қорғаушылар компьютерлік техника, камералар, трансляцияға арналған жабдықтар және тергеу үшін маңызы бар басқа да заттарды тәркіледі. Қыз бен студия әкімшісі полиция бөлімшесіне жеткізілді.
"Аталған дерек бойынша қылмыстық іс қозғалды. Тергеу заңсыз әрекеттің барлық мән-жайын, сондай-ақ заңсыз студияны ұйымдастыруға және оның жұмыс істеуіне қатысы бар тұлғаларды анықтап жатыр", - деп хабарлады полиция.
Полицейлер интернеттегі заңсыз әрекеттер цифрлық із қалдыратынын, сондықтан тергеу барысында кез келген құқықбұзушылық анықталатынын ескертіп, жазадан құтылу мүмкін емес екенін ескертті.